नासा अन् इस्त्रोच्या नावाखाली बतावणी, २०० कोटींचं आमिष, शेतकऱ्याला कोट्यवधींचा गंडा, काय घडलं?

मिळालेल्या माहितीनुसार, २०१४ ते २०१६ च्या दरम्यान रफिक तांबोळी यांच्याशी फिर्यादीची ओळख झाली होती. त्यावेळी त्याने आळंदी येथील लिटिगेशनचा प्लॉट असून तो क्लिअर करण्यासाठी पैशाची आवश्यकता असल्याचे सांगितले होते. प्लॉटची विक्री झाल्यावर त्यातून ५० कोटी रुपये मिळणार असून त्यातील ४ कोटी रुपये देतो, असे आमिष त्याने दाखवले. त्यामुळे फिर्यादीने त्याला १ लाख रुपये रोख दिले. १५ दिवसानंतर तांबोळी याने पुन्हा पैशाची मागणी केली. त्यावेळी त्याला २ लाख रुपयांची मदत करण्यात आली. ४ कोटींचे आमिष दाखवत त्याने पुन्हा पैशाची मागणी केल्यावर शेलार यांनी त्याच्या खात्यावर ४ लाख ६५ हजार रुपये भरले.

त्यानंतरही रफिक आणि त्याची पत्नी आतिया या दोघांच्या खात्यावर १२ ते १७ लाख रुपये भरण्यात आले. २०१७ मध्ये फिर्यादीने पैसे परत मागितले असता त्याने माझ्याकडे काशाचे भांडे असून ते २५० वर्षांपूर्वीचे आहे. त्यात वीज पडून इलेक्ट्रीक पॉवर तयार झालेली आहे. हे भांडे नासा, इस्त्रोसारख्या संस्था विकत घेतात. ही रक्कम २०० ते ३०० कोटी असेल. परंतू त्यात किती पॉवर निर्माण झाली आहे, याची पडताळणी करण्यासाठी मला फी भरावी लागेल. सध्या माझ्याकडे पैसे नाहीत. तुम्ही मदत करा, असे सांगितले. त्याला भुलून फिर्यादीने सणसर येथील गट क्र. ६३ मधील ९० गुंठे जमीन विकत त्याला ९० लाख रुपये दिले. त्यानंतर तो मोबाईल बंद करून पसार झाला.
गुंतवणूक करण्याचा बहाणा, महिलेनं ओढलं जाळ्यात, ५ जणांना ४७ लाखांचा गंडा, अखेर गुन्हा दाखल
रफिक याचा शोध घेत असतानाच फिर्यादीची शेख आणि उमापुरे यांच्याशी भेट झाली. फिर्यादी आर्थिक अडचणीत आले होते. त्याचा फायदा घेत या दोघांनीही काशाच्या भांड्याची कल्पना पुन्हा त्यांच्या डोक्यात उतरवली. त्यामुळे फिर्यादीने पुन्हा जमीन गहाण ठेवत वेळोवेळी १७ लाख रुपये रोख आणि उमापुरे याच्या खात्यावर १ लाख ११ हजार रुपयांची रक्कम भरली. धनाजी पाटील याने सुद्धा याच पद्धतीने फिर्यादीला आमिष दाखवत ३ लाख ८० हजार रुपये खात्यावर भरण्यास भाग पाडले असल्याचे फिर्यादीत म्हटले आहे. याप्रकरणी पोलिसांचा तपास सुरू आहे.