चिंचवडमध्ये दीड लाखांची चोरी

चिंचवडमधील बिजलीनगर परिसरात अज्ञात चोरट्यांनी घरफोडी करून एक लाख ५० हजार रुपये किमतीचे सोन्याचे दागिने चोरून नेले. ही घटना रविवारी (२८ मार्च) सकाळी उघडकीस आली.

रेणुका रघुनाथ कुलकर्णी (वय २५, रा. बळवंतनगर, बिजलीनगर, चिंचवड) यांनी याबाबत चिंचवड पोलिस ठाण्यात फिर्याद दिली. त्यानुसार पोलिसांनी अज्ञात चोरट्यांच्या विरोधात गुन्हा दाखल केला.

पोलिसांनी दिलेल्या माहितीनुसार, फिर्यादी कुलकर्णी यांचे घर शनिवारी सकाळी बारा ते रविवारी सकाळी अकरा या कालावधीत बंद होते. या कालावधीत अज्ञात चोरट्यांनी कुलकर्णी यांच्या घराच्या दरवाजाचा कडीकोयंडा तोडून आत प्रवेश केला, तसेच घरातील कपाटातून पाच तोळे वजनाचे एक लाख ५० हजार रुपये किमतीचे सोन्याचे दागिने चोरून नेले. या प्रकरणी चिंचवड पोलिस तपास करीत आहेत.